دورة التفريز من الالف للياء

دورتنا النهاردة ان شاءالله فى التفريز من الالف للياء
دورة التفريز من الالف للياء GR-G652JVQ.

بسم الله نبدأ

دورتنا عن التفريز او التجميد او الاحتفاظ بالأكل فى الفريزر او الديب فريزر لاطول فتره ممكنه مسموح بيها
التفريز مش معناه اننا احول الفريزر عندى لدولاب مطبخ
ومش علشان نفرز شويه اكل فى كيس وخلاص ...لأ
علشان نرد على اسئله كتير بتيجى فى دماغنا ياترى ده ينفع يتفرز ولا لأ ؟؟
ياترى ده افرزه نىء ولا مستوى ولا نص مطهى
ياترى ده افرزه محشو ولا بدون الحشو
ياترى ده افرزه عجينة بس ولا اشكله ؟؟
والاهم اننا لما افرز ياترى ححطه فى ايه ؟؟؟ فى كيس نايلون ولا علب بلاستيك ؟؟ ولا فى صوانى ؟؟
التفريز مش معناه ابدا
اننا اشترى الخضار واجهزه واضعه فى اكياس او علب واحطه فى الفريزر و انساااه يعنى من غير ما اعرف انا حشيله قد ايه ؟؟ من غير ما اسئل نفسى ححتفظ بيه قد ايه قبل ما يفقد قيمته من طول فترة التجميد ...من غير ما افقد جزء من طعمه ونكهته

للتفريز اصول ومده محدش يقول ان التفريز مفتوووح
طيب ايه معنى التفريز ؟؟؟؟ او انا التفريز بيعنى ليا شخصيا ايه ؟؟؟

التفريز :-

1- انقاذ فى الزيارات المفاجئة والغير متوقعه

بس مش معنى كده اننا اعمل كام اكله واحطهم فى الفريزر للطوارىء وان محصلتش الزيارات الغير متوقعه اننا افضل سيباه فى الفريزر
لألألألأ غلط
والصح انك قبل ما يوصل لمرحله انه يفقد طعمه وقيمته اطلعه واطبخه لاسرتى وبعدين اعمل غيره طازه

2- اذا كانت الأصناف اللى عايزة اجمدها فى الفريزر اصناف موسمية بمعنى ان النوع ده له وقت معين فى السنه وبعدين بيختفى واسرتى بتحبه

3- اذا كانت عندى ظروف تمنعنى انى اطبخ يوميا او حتى كام يوم فى الاسبوع بسبب عملك خارج البيت او بسبب مرض أواجهاد

4- اذا كنا فى وقت معين بيتطلب اننا نقوم فيه بعزايم مثل شهر رمضان ولكن الوقت بيكون محسوب علينا للاستفاده فيه بالعباده عن المطبخ

التفريز حتلاقيه مالى المنتديات بس المهم انك قبل ماتفرزى تفهمى ايوه تفهمى علشان تبقى تفرزى بعد كده من غير ماتسئلى

دورتنا يوميه ان شاءالله بدون اى شروط خااالص فقط
ضعى شعار الدورة فى توقيعك وشاركى معانا سواء بالمعرفه او بالسؤال
واحيانا حسئل سؤال واخليكم تجاوبوا عليه واللى متعرفش مش مهم تقول اللى ييجى على بالها يمكن يطلع صح يمكن نستفيد احنا منه
وفى اخر الدورة حنوزع شعارات هديه للمشاركات الاكتر نشاط وبرضه للمشتركات اللى حيقولوا انهم استفادوا من الدورة حتى ولو مكنش عندها معلومات مسبقه لكن هى اللى اكتسبت من الدورة معلومات
اترككم النهارده لحد ما تضعوا الشعار فى توقيعاتكم ولنا عوده ان شاءالله

(2)

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 900x423 و بحجم 248KB.

ان شاءالله حنتكلم عن انواع الطعام وحنتكلم عن كل صنف بالتفصيل وحنقسمه على ايام الدورة واللى مش فاهمه حاجة تسئل قبل ما ننقل للصنف اللى بعده

فائدة التجميد فى حفظ الاطعمه
تجميد الفاكهه
تجميد الخضار
تجميد اللحوم
تجميد العجائن والمخبوزات

وفيه بس ملاحظه بلاحظها فى تفكير بعض البنات

وهى انها بتفتكر ان الحفظ ده بيتم بكميات كبيرة وبتبقى مبسوطه ان كل الانواع محفوظه عندها وان الفريزر عمران بالطعام والمعلومه دى مش مظبوطه لان مش معنى انى حفظت الاكل فى الفريزر انه حيعيش عندى فى الفريزر زى ما انتى عاوزة او لفترة طويله وده غلط
ليــــــــــــــــة ؟
لان الديب فريزر بتاع المحلات والمخازن الكبيرة مش زى الديب فريزر بتاع البيت ابداااااا

هل ممكن تتبعى كل اصول التفريز وبالرغم من كده مينجحش ؟؟ نعــــــم
ليــــــــــــــه؟

بسبب حاجة كبيرة قوى ومضره قوى ولكنها عبيطه قوى وهى :-

طريقه ترتيب الاطعمه فى الفريزر او الديب فريزر

ييعنى تحطيهم جنب بعض ولازقين فى بعض

او تحطيهم فوق بعض وكل ده مش صح

يعنى اهتمى كمان بطريقه وضع وترتيب الطعام المطلوب تجميده لان الوضع السىء

بيخلى اللحمه مثلا تتجمد ببطىء لان درجة البروده مش وصلالها كويس فتكون النتيجة

ان اللحمة بتسرب السائل بتاعها وبالتالى لما تيجى تطبخيها بيكون اللحم ملهوش نكهه

اللحمة الطازجه وبتكون لينه عند الطهى
يعنى ايه بتكون لينه عند الطهى؟ يعنى بع ماتطبخيها تلاقى طعمها طرى قوى وانتى تفتكرى ان انتى سوتيها قوى والكن النتيجة دى بتكون من التفريز مش منك انتى

ثانيا. هل كل الطعام يتفع يتجمد ؟؟ حنشوف

· اللحمه النيه و اللحمه المطهيه ..ايوة صالحه للتجميد وبتحتفظ بجودتها وبطعمها

· الخضار المطهى .............ايوة صالح للتجميد

· المحبوزات .......ايوه صالحه للتجميد

لكن .......الحاجات اللى مبنفضلش نجمدها مبنفضلش ليه ؟؟؟؟؟

· خضار السلطة زى الخيار والخس والجرجير والبقدونس والطماطم كلها لاتصلح للتجميد لانها بتذبل وبتفقد سوائلها وشكلها الطازج لما بيذوب الثلج عنها

· بعض الفواكه زى الموز والبطيخ والشمام والفراوله تفقد شكلها وصلابتها وبتتسرب سوائلها ايضا

· البيض المسلوق جامد لايصلح للتجميد لأن بياض البيض بيكون كالأسفنج ويتغير طعمه

· صلصه المايونيز لا تصلح للتجميد لان مكوناتها تنفصل عند اذابه الثلج

· التورتة والجاتوة والفطائر المحشوه بالكستردة والمجمله بالكريم شانتى

· الذبادى والكريم شانتى لاتصلح للتجميد لان مكواناتها تنفصل الا اذا كانت مختلطه بمواد اخرى كا لأيس كريم ِ
ِ

(3)

ايه هى الادوات المناسبه لتغليف وحفظ الاطعمه بالتجميد؟؟

1- الاكياس البلاستيك النظيفه السميكة بمختلف الاحجام

2-الاطباق البايركس والطواجن الفخار وهى مأمونه لحفظ الاطعمه كالمكرونة بالبشاميل والكانيلونى والخضر بالصلصة ، ويمكن اعادة تسخينها بالطعام المجمد

3- العلب البلاستيك المختلفه الاحجام والاطباق البلاستيك والكرتون القوى والفويل

4- من الممكن استعمال الكزرولة والاوانى المستعمله يوميا حتى يتجمد الطعام بها ....ازاااى ؟؟؟

انك تبطنى الكزروله الاول بالفويل
وبعدين تحطى الطعام المطلوب تجميده زى المحشى والخضر المطهيه
ثم نضعها فى الفريزر لحد ما يتجمد الطعام
ثم ناخد الطعام بعد ما اتجمد زى ماهو بالفويل حيكون كده الطعام أخد شكل الاناء اللى اتحط فيه
ثم نضعه داخل كيس بلاستيك ويقفل جيدا ويوضع فى الفريزر حتى لايشغل مكانا كبيرا

... وعند الحاجة ينزع الفويل ويعاد وضع الطعام فى الاناء الذى وضع فيه قبل التجميد لاعاده تسخينه او طهيه

طيب ازاى نقفل العبوات ؟؟؟؟

لالالالابد من اخراج الهواء بقدر الامكان قبل التجميد وهى طريقه سهله اذا كان المستعمل كيس بلاستبك ...ازاى ؟؟؟

يملأ الكيس الى 3/4 ة بالطعام المطلوب تجميده كالخضر مثلا

ويوضع على المنضده ويضغط على الكيس فى اتجاه الفتحه

لاخراج الهواء بقدر الامكان ثم يقفل جيدا ( بتسخين نصل سكين ويمرر على الحواف مع الضغط عليها فتلتصق ببعضها

· اما فى حالى العلب والاوانى فلا يمكن اخراج الهواء الذى يعمل على تغير اللون ولذلك يجب ان :

يملأ الاناء الى 3/4 ة ويغطى سطحه بالفويل او ورق ذبد قبل قفله او وضعه داخل كيس بلاستيك يعنى لازم تغطيه الاول وبعدين تفغليه وبعدين تحطيه فى كيس حتى لا تتأكسد المحتويات بفعل الاكسجين ويتغير لون الطعام وشكله ويجف سطحه

(4)

طيب هل من الضرورى ان نذيب الثلج ونفك التجمد قبل استخدام الطعام ؟؟ ولا ممكن نسويه على طول وهو متجمد يعنى من الفريزر للفرن على طول ؟؟؟

فى معظم الحالات ....نعم ......

يفضل اننا نذوب الثلج قبل طهيها وبالأخص المقاطع الكبيرة من اللحمة التى تنضج من الخارج ويبقى داخلها نيئا باردا ....

ولكن بمجرد اذابه الثلج يجب ان تطهى مباشرة حتى لاتتعرض للفساد

وايضا فى الانواع التى تغلف بالبيض والبقسماط (البانية) او الدجاج المخلى او الحمام فيجب صهر الثلج قبل طهيها

لاعاده غسلها مره اخرى من بقايا الدم وميكروب السلمونيلا (وهو نوع من البكتريا السامه ) التى توجد غالبا فى الدجاج
اما الأطعمه التى لاتحتاج الى اذابه الثلج قبل طهيها:-

الخضر المجمده كالبسله والفاصوليا الخضراء وغيرها
الخضر المطهيه بصلصه الطماطم وطواجن الخضار
انواع الحساء (الشوربة - المرقة)
شرائح اللحم (البفتيك )
كباب الحله (القطع)
اللحم المفرى للعصاج

اما التى توضع فى الفرن.....

فيجب ان تصهر نوعا حتى لا ينكسر البايركس وحتى لا تأخذ وقتا
طويلا قد يؤدى الى احتراق السطح وجفافه

طيب ازاى نسوى الخضار المجمد ؟

يجب ان نضع الخضر على نار هادئة لاعاده تسخينها او طهيها

وهى فى الحاله المجمدة مع اعطاء الوقت الكافى حتى تصل

الحرارة الى داخلها مع تقليبها باحتراس بعد ذوبان الثلج.

(يعنى بتحطيها على نار هادية لتسخينها الاول علشان متغليش بسرعه وبيكون التلج لسه فى اجزاء منها )

5

طريقة تجميد المرقة (الشوربة – الحساء )

اذا تبقى عندك مرقه من اللحم او الدجاج اتركيها لحد ماتبرد خالص
وبعدين ضعيها فى التلاجة بس غطيها

طبعا حتلاحظى ان الدهون اللى فيها طفيت على سطخ المرقه وعملت زى طبقه مستديرة اوعى تنزعيها الا لما تيجى تستخدمى المرقه

لان الطبقة دى بتعمل عازل بين الهواء وبين المرقه ودة يخليها ماتفسدش بسرعه ولما تيجى تستخدمى المرقه ابقى انزعى طبقة الدسم بالمعلقه

اما اذا كنتى ناوية متيتخدميش المرقه اكتر من اسبوع يبفى طلعى المرقه كل يومين

واغليها او ضعيها من الاول بقى فى الفريزر وريحى نفسك من حكايه الغلى كل يومين

تجميد اللحوم

عندنا طريقتين للاحتفاظ باللحمة

1- طريفة الحفظ بالتبريد 2- طريقة الحفظ بالتجميد

الحفظ بالتبريد دى معناها انك لما تشترى اللحمة وحتطبخيها على طول يعنى فى خلال يومين تلاتة بسسسس

فتعملى ايه ؟ بدل ماتدخليها الفريزر وتطلعيها تانى بعد يوم او يومين

تروحى حطاها على رف التلاجة اللى تحت الفريزر على طول لان الرف ده بيكون

ابرد مكان بعد الغريزر على طول تحطى اللحمة او الطيور او الاسماك بس على

فكرة حاولى تخلى اللحمة فطع كبيرة لانها بتستحمل اكتر فى التبريد عن اللحمة المفرومة مثلا

2- طريقة الحفظ بالتجميد بتكون افضل طريقة بس خلى بالك لما تضعى اللحمة فى الفريزر للتجميد بيكون الفترة لا تذيد من اسبوعين لشهر لكن لو حتجمديها فى الديب فريزر حتكون مدتها عدة شهور

ملحوظة :- خلى بالك ان الاكياس تكون مقفوله كويس وتكون اللحمة مفيهاش

عضم يقطع الكيس وده لو حصل حتلاقى قطعه اللحمة اللى الكيس فيها كان مفتوح

حتلافى لونها اغمق من الحتت التانية بتكون لونها غامق زى المقدده او المحروقة

3- طريقه حفظ اللحمة المسلوقه :- يا اما بعد ماتسلقيها وتبرد تضعيها

فى كيس فى الفريزر يا اما بعد ماتبرد تغطى الحله بالعطاء كويس وتستخدميها بعد يوم او يومين بس

الكفتة والبورجر

ترص وهى نية فى طبق بايركس او فى علبه بلاستيك وبعدين نضعها فى كيس بلاستيك كبير
او
نحمر الكفتة ونسويها عادى فى صلصة طماطم (داوود باشا مثلا او كفتة

الارز) على نار هادية من 3-4 دقايق ونتركها لحد ماتبرد وبعدين نضعها فى

البايركس او طاجن وبعدين كيس نايلون وندخلها تجمد ويفضل الاتزيد مدة الحفظ عن شهر

الكبيبة
دورة التفريز من الالف للياء Efb926bfce4f58539b1c2b45a5676b09

دورة التفريز من الالف للياء Efb926bfce4f58539b1c2b45a5676b09

بعد ما نعملها وهى نيئة ونرصصها فى صينية بجانب بعضها لحد ماتجمد

وبعدين ممكن نسيبها زى ما هى .....او نشيلها ونضعها فى اكياس نايلون

ولما نيجى نستخدمها نخليها تفك من التثليج شوية وبعدين نرشها بالمادة

الدهنيه و ندخلها الفرن متوسط الحرارة لحد ماتستوى وتحمر

6

طهى اللحوم المجمدة

اولا :- يجب طهى اللحوم مباشرة بعد ما التلج يسيح على طول حتى لا تتعرض للفساد وحتى لاتفقد جزء كبير من بروتيناتها وقيمتها الغذائية

ثانيآ :- قد تطهى وهى مجمدة وهو الافضل وخاصه الستيك والبفتيك وكباب الحله والعصاج والتامة التجهيز زى الفراخ البانية او البفتيك البانية ( الجاهزة بالبيض والبقسماط )
بنضعها فى المقلاية على نار هادية لحد ما يزوب الثلج وبعدين تكملى تحميرها عادى او تشويها عادى

معلومة مهمة :- اذا اضطريتى انك تطهى اللحمة المجمدة ومعندكيش وقت تتركيها تفك تعملى ايه ؟؟؟؟؟

طلعى اللحمة من الكيس وهى مجمده واغسليها وهى مجمدة وبعدين ضعيها

فى الحله على النار بس خلى درجة الحرارة هادية لحد مايسيح التلج

واللحمة تشربه كده اللحمة متفقدش العصارة بتاعتها اللى حتلاحظيه بس

انها حتاخد منك وقت اطول شويه

طيب واذا كنتى حتطلعى اللحمة عادى من الفريزر وحتفكيها علشان تطبخيها تعرفى ان فيه 4 طرق مش طريقة واحدة ؟؟؟
الطريقة الاولى ......طلعى كيس اللحمة من الفريزر وحطيه فى طبق

مثلا وافتحى بس الكيس من فوق وحطيه على الرف اللى تحت الفزيزر

على طول من بليل عشان التلج يسيح على مهله ويفضل اللحم طرى بس

خلى بالك الطريقة دى بتاخد وقت اكتر شوية وخصوصا فى الشتاء يعنى ممكن الصبح تلاقيه لسة مفكش قوى

الطريقة التانية ....انك تطلعى كيس اللحمة فى طبق وتخليه بره فى المطبخ

الطريقه التالتة .... انك تشيلى اللحمة من الكيس وتحطيها فى طبق

تحت مايت الحنفية لحد ماالتلج يسيح لكن المفروم والبفتيك يفضل بكيسه

تحت المياه وتشليه اول ما التلج يسيح

الطريقة الرابعه ......انك تنقعى اللحمة او الفرخة او الحمام او الارنب او البطة فى طبق فيه ماء

الطيور المجمدة :-

يجب صهر الثلج حتى يمكن اعاده غسلها جيدا بعد التثليج

الأسماك :-

نغسلها و ننظفها ونصفيها من الماء تماما ونلفها فى ورق ذبدة او ورق فويل وندخلها فى كيس بلاستيك ونقفلها كويس قوى ونجمدها

او
ممكن تقطعيه شرائح وترتبيه فى طبق بحيث يفصل بينه ورق ذبدة وبعدين نضعه فى علبه او كيس بلاستيك

مده حفظ السمك تكون من شهر لكن لو انتى مجمداه وهو طازج تماما ممكن يبقى متجمد لحد 3 شهور

الجمبرى :-

لازم قبل ما تجمديه يكون طااازج تماما

تغسليه كويس من الرمل وبعدين تصفيه من الماء وتنزعى راسه بس

وبعدين ضعيه فى علبة او طبق وبرضه ياريت لو تفصلى بينه بورق زبده او فويل وتحفظية

ويجب الا تزيد مده حفظة عن شهر واحد

ملحوظة
ده ورق الذبدة يا بنات زمان ومازال كان بيتباع على هيئة ورق مفرد لكن دلوقتلى بيتباع زى الفويل فى رول

دورة التفريز من الالف للياء Ct1-31_waxpaper

دورة التفريز من الالف للياء Ct1-31_waxpaper

دورة التفريز من الالف للياء 13-flatten-into-patties

7
[size=25]تجميد منتجات الالبان [/size]

(القشدة – الزبد – اللبن )

اولا ايه هى منتجات الالبان اللى مينفعش نجمدها ؟؟؟
مثل الذبادى والكريم شانتى ( الكريمة المخفوقه) واللبن الحليب
ولكن اذا اضطرتك الظروف لتجميدهم يبقى تجمدى كميه محدودة ولاسابيع قليله بسسس

تجميد الذبد

يفضل ان يحتفط بالذبد غير المملح فقط[size=25] لأن
الذبد المملح بيزنخ بسرعه
1- يقسم الذبد الى قطع مناسبه على قد استهلاكك يعنى حوالى 1/2 كيلو
2- يلف فى ورق ذبد ثم نضعه فى كيس بلاستيك ويجمد

تجميد الجبنة الرومى المبشورة

ضعى الجبن الرومى المبشور فى كيس بلاستيك او علبه بلاستيك عند التجميد
وعند الاستخدام يفضل انك تخلطيه بقليل من الذبد السايح
وعند حفظ الجبنة بفضل ان نضع بين كل شريحه والتانية ورقه ذبده

لما بتجمدى الجبنة البيضاء وتيجى تفكيها بتلاحظى ايه ؟؟؟

حتلاحظى انها حتكون محبحبه او مخرزة او مفروله ولعالجة ده
اهرسيها بالشوكة وبعدين اخلطيها بقليل من الحليب البارد

حفظ الكريمة غير المخفوقه (القشدة )

نجمد الكريمة اللبانى التقيلة (يعنى زى ماهى زى مابنشتريها )
لكن متجمديش الكريمة اللبانى بعد ضربها وتحويلها لكريم شانتى جاهزة للتزيين

لانها حتخرز معاكى ومينفعش انك تضربيها تانى
وتحفظ الكريمة..مثل طريقه الحليب

تجميد الحليب

انسب انواع اللبن للتجميد هو اللبن المجنس (وهو غير متوافر فى مصر )
يحفظ الحليب فى علب كرتون او علبه بلاستيك بغطاء مع ترك 1/4 العلبه فارغ
تحسبا لتمدد الحليب المثلج ثم نضع العلبه داخل كيس بلاستيك افضل
مده الحفظ لا تزيد عن شهر واحد
وعند الرغبه فى استخدامه :
نترك العلبه خارج التلاجه متغطيه زى ماهى لحد مايسيح الثلج
او
طلعى الحليب من العلبة او الكيس وحطيه زى ماهو قطعه حليب مجمده فى اناء كبير وارفعيه على نار هادية لحد ما يفك ويرجع سايل لطبيعته
اذا لاحظتى انفصال مكوناته الى حد ما :
قلبيه قلبيه لحد ما يتجانس تانى

امتى نجمد الحليب ؟؟؟
يا اما اول ماتشتريه على طول
او
اغليه واتركيه لحد ما يبرد وبعدين جمديه

[/size]

بصوا يا بنات لازم تعرفى ان فيه فرق بين فريزر التلاجة والديب فريزر المنفصل

الفريزر ده بعتبره تفريز يومى شهرى لكن الديب فريزر بعتبره تفريز شهرى سنوى
ليييييييه ؟؟؟؟
قلتلكم ان الفريزر ايدك بتفتحه تقريبا كل يوم .. يا اما بتطلعى مكعبات ثلج للمياه او خبز حتطلعيه تسخنيه او مياه مثلجه يعنى اول ما باب الفريزر يتفتح بيحصل تغيير مفاجىء وسريع لدرجة حرارة الفريزر علشان كده لما قلتلكم حتى الفريزر له طريقه معينة فى الترتيب ...ازاى ؟؟؟؟

طريقه ترتيب الفريزر :-

اولا :- فاكرين لما قلنا التفريز بالتبريد والتفريز بالتجميد ؟؟؟؟

احنا هنا بقى حنستعمل التفريز بالتبريد ....ازاى ؟؟؟؟؟

بصوا يا بنات لو نفترض ان انتوا اشتريتوا اللحوم بتاعتكم كلها مرة واحده بالشهر وقررتى الاحتفاظ بيها نيه زى حبيبه ابراهيم طبعا طريقتكم صح لكن ايه الطريقه اللى أصح ؟؟؟؟؟

1- حتقسمى كل نوع لوحده من بفتيك لكباب حله لصدور فراخ سليمه او بانيه وهكذا
2- تضعى فى كل كيس مقدار الاكله الواحده او اكلتين
3- نحكم قفل الاكياس كويس سواء بالماكينة المخصوص بتاعه لحام الاكياس او بتسخين السكينة زى ما قلنا مع ملاحظة تفريغ الهواء بقدر المستطاع
4- الزقى ورقه (او استيكرز بتاع كراسات المدرسه بتاع الاولاد اللى بيكتبوا عليه اساميهم ) اكتبى عليها نوع ما بداخل الكيس
5- ضعى اول كميه من الاكياس فى ارضيه الفريزر ومتحطيش اى دور اكياس فوقهم
6- ضعى باقى الاكياس فى الرف العلوى اللى تحت الفريزر على طول وبعد نص ساعه خدى من على الرف اكياس وضعيها فى الفريزر فوق الاكياس اللى انتى حطاها وهكذا .....

طبعا كده عرفتوا ان الحركة دى حتخلى البرودة تكسى كيس اللحمة من جميع الجهات قبل ما تضعى صف تانى فوقه
وكده كده الصف التانى اللى انتى حتحطيه مش حيكون سخن ...حيكون بارد من التبريد اللى اخده على الرف ....

اتمنى انكم تكونوا فاهمين قصدى ويكون الموضوع سهل وخدى بالك الاكياس اللى فى التبريد حتكون زى الفل علشان مفيش واحده تسئل وتقولى (كده اللحمة مش حتبوظ ؟)

ثانيا :- لما تيجى ترتبى الفريزر متحطيش مثلا جوه اكياس اللحمة المفرومة كلها وبعدها اكياس البفتيك وجنبها فوق بعض اكياس الفراخ لألألألألألألألأ

ضعى اكياس الاسبوع المختلفه فوق بعض والصف اللى جنبه برضه ضعى اكياس الاسبوع فوق بعض

مثاااااااال :-
انتى حتاكلى يوم السبت صينيه لحمه
وحتاكلى يوم الاحد فراخ مشويه
وحتاكلى يوم الاتنين قطع لحمة بالكارى او بالصوص او للفته
وحتاكلى يوم الثلاثاء جمبرى

يبقى ترصصى الاكياس فوق بعض زى ما حتاكليهم بالترتيب عارفين برضه ليه ؟؟؟
(ما انا قلتلكم عيزاكم تفهموا التفريز مش تحفظوه او تنقلوه وخلاص )

علشان لما تفتحى باب الفريزر تبقى كل الاصناف قدامك متفضليش تشيلى من قدام علشان توصلى للاكياس اللى ورا ... عايزاكى تفتحى الفريزر تاخدى من قدامك بأسرع وقت وفى اقل وقت وكده اقدر اقولك ان مده التفريز اللى احنا محددنها ممكن تطول معاكى اكتر وده افضل لان فيه ايام اكيد بناكل فيها من بره او بنعمل كشرى او عدس بدون استخدام اللحوم

اتمنى اتمنى انى اكون بقدر اوصلكم المعلومة وبتفهموها بسهوله وعلى فكرة قليل من التدبر كثير فى توفير الوقت والمجهود

8
تفريز الفاكهه

دورة التفريز من الالف للياء F5093ff20b58d71dcf9478f7cbf803bb

طرق تجميد الفاكهه الطازجة

هناك عدة طرق :
1* الحفظ فى سكر بودرة ...
تناسب هذه الطريقه الفاكهه اللينة الكثيرة العصارة كالفراوله

ويستعمل فيها من 2 – 3 معالق كبيرة سكر لكل 1/2 كيلو فاكهه معده ..ازاى ؟؟

توضع الفاكهه فى اناء مسطح كبير وترش بطبقه من السكر ثم ترص بالراحه خالص فى علبه وتغطى جيدا وتجمد

2* الحفظ فى محلول سكرى ...
وهو يناسب الفاكهه المتوسطة الليونة كالمشمش والخوخ والتفاح و الكمثرى ويمكن استعمالها بعد اذابه الثلج كنوع من الكمبوت وممكن حشو التارت والتورتة
ويعمل شراب سكرى خفيف او متوسط ويفضل الخفيف

الشراب الخفيف ( 400ج سكر لكل 2 كوب ماء )حوالى كوبايتين سكر
الشراب المتوسط ( 600ج سكر لكل 2 كوب ماء ) حوالى 3 كوبايات سكر

يذاب السكر فى الماء على نار هادئة مع التقليب لمدة من 2 – 3 دقائق ..ويبرد قبل الاستعمال

3* الحفظ فى الماء .طب ليه فى الماء ؟؟؟
دة علشان اللى بيعملوا ريجيم وعايزين يجمدوا فاكهه وممكن للمرضى اللى عندهم سكر
بتجهزى الفاكهه عادى وترصصيها فى العلبة مثلا وتغطى الفاكهه بماء بارد وعليه عصير ليمون

4* الحفظ بيورية...
دى بتنفع للفاكهه المستويه قوى وتكاد تكون مهريه اغسليها على مهلك وبعدين اهرسيها لو كانت مثلا زى المشمش او الفراولة او العنب لكن لو تفاح مثلا وحيتعبك فى الهرس يبقى سويه على النار فى شويه ماء علشان يطرى اكتر وبعدين اهرسيه بميته بالشوكه او بأله الهرس وبعدين ضعى السكر

مثلا 100 ج سكر لكل 1/2 كيلو فاكهه وعصير ليمونة
وبعدين ضعيها فى العلبة وزى ما اتفقنا حاولى تخرجى الهواء بأنك تخبطى العلبه على الترابيزة كذا مرة وتروحى مغطياها على طول

5* تحفظ كعصير....
دى بتنفع مع الفاكهه اللى فيها عصير كتير زى البرتقال والليمون والجريب فروت والفراولة بتغسلى الفاكهه وتعصريها بس وانتى بتعصريها متوصليش قوى للقشرة علشان العصير ميمررش وبعدين نضيف السكر للعصير وعصير ليمونة لكل 1/2 كيلو عصير علشان يفضل لونه طبيعى

تفريز التفاح والكمثرى

لازم تكون الثمرة مستويه وسليمة
1- نقشر الفاكهه وننزع البزور ونقطعها شرايح او مكعبات (زى ما انتى عاوزه)
2- نضع عليها ماء وعصير ليمون علشان متسودش
3- وبعدين اسلقيها لمدة دقيقتين فى ماء فقط او فى شراب سكرى خفيف او متوسط مع عصير ليمونة
4- اتركيها تبرد تماما وبعدين ضعيها فى العلبه مع الشراب بتاعها
5- وبعدين غطيها وجمديها واحفظيها فى الفريزرمن 9 شهور لسنه كامله

تفريز المشمش والخوخ

1- نغسل الفاكهه ونشيل النواه اللى جوه
2- ضعيها فى طبق وضعى عليها شراب سكرى متوسط او تعصرى عليها ليمون وترشى عليها سكر
3- اتركيها تبرد خااالص وبعدين غطيها وجمديها واحفظيها فى الفريزرمن 9 شهور لسنه كامله

تفريز البرتقال واليوسفى والجريب فروت يعنى الموالح

1- اختارى من البرتقال مثلا البرتقال بصره (علشان بزره قليل ) ويكون مستوى مش اخضر
2- قشريه وانزعى الطبقه البيضاء اللى بتكون بين الفصوص والقشرة
3- فصصى الفصوص وهى سليمة زى ما هى ورصيها فى العلبه
4- صبى عليها الشراب الخفيف او المتوسط بارد
5- غطيه ودخليه يجمد وتبقى تجملى بيه الحلويات او تحطيه فى الفروت سلاد

تفريز الفراوله

1- اختاريها تكون جامده او ماسكة نفسها وسليمه وبعدين شيلى الكاس الاخضر بتاعها واغسليها
2- اذا كانت فيه شوية فراوله مثلا حجمها كبير قطعيها شرايح
3- ضعى الفراولة فى العلبة وصبى عليها الشراب الخفيف وتقفليها كويس وتحفظيها
اما اذا كنتى عايزة تحفظيها للريجيم مثلا او تحفظيها من غير سكر بعد ماتضعيها فى العلبة غطيها بماء وتضيفيله عصير ليمون برضه
4- اقفلى العلبة كويس وجمديها

تفريز العنب

1- يفضل تفريز العنب البناتى
2- اختاري العنب تكون حباته جامده وسليمه واغسليه
3- ضعى العنب فى العلبة وصبى عليه الشراب الخفيف وتقفليها كويس وتحفظيها
اما اذا كنتى عايزة تحفظيه من غير سكر بعد ماتضعيه فى العلبة غطيه بماء وتضيفيله عصير ليمون برضه
اقفلى العلبة كويس وجمديها

بالنسبة لحفظ الفراوله والعنب (عصير)
لو عايزة تحفظيهم عصير بعد ماتغسليهم اضربيهم عادى كعصير بس يا اما تضعى عليهم سكر بسيط يا اما تعصرى عليها ليمون

تفريز الخضروات
دورة التفريز من الالف للياء Vegetable-collection-thumb4259815

تجميد الخضار(مهمه)

عند تجميد الخضر الطازجة بنجمدها زى الفاكهه فيما عدا ان ثمار الفاكهه يجب ان تكون تامه النضج سليمة غير معطوبة
اما فى الخضر فقد وجد انها بتكون افضل طعما قبل ان يكتمل نضجها تماما اى فى اول الموسم وخاصه البسلة والفاصوليا الخضراء لية؟؟؟؟؟؟

لان نسبة السكر فى هذه الخضر وهى صغيرة السن تكسبها طعما مستحبا وعندما تصير الثمار كامله النضج يتحول السكر بها الى نشا يفقدها طعمها الحلو ويجعل نسيجها خشن ولونها غير مستحب

يعنى بنفضل نفرز الخضار وهو طالع جديد مش زى ما بنعمل نيجى على اخر الموسم نستنى لما يرخص نشترى كميه نفرزها
علشان كده ساعات لما تيجى تفرزى فاصوليا مثلا تقولى ان انتى حتى بعد مابتسويها بتكون ناشفه او بتشد او بتاخد وقت فى السوى

تجميد البسلة والفاصوليا الخضراء و الجزر والبطاطس و الكوسة وغيرهم من الخضروات

بالنسبة للبسلة
فصصيها واغسليها

الفاصوليا الخضراء
شيلى الخيوط الرفيعه اللى فى الاجناب وقطعيها بالورب (شكل المكرونة القلم بتاعه المكرونة فرن)

الجزر والبطاطس والكوسة
تكحت وتقطع شرائح او حلقات او مكعبات

طيب نسلقهم ازاى ؟؟؟؟؟؟؟

1- جهزى حلة كبيرة وضعى فيها ماء تقريبا 3 – 4 لتر لكل كيلو خضاء
2- اول ما المياه تغلى
3- ضعى الخضار اللى انتى جهزتيه فى مصفاه ونزلى المصفاه اللى فيها الخضار فى الماء وهو بيغلى
4- غطى الحله وابقى اهم حاجة متأكده ان الخضار كله مغمور فى المياه كويس
5- (طبعا لما حتحطى الخضاء فى الماء المغلى حتلاحظى ان الماء حيبطل غليان ) اول ماتحطى الخضار والمياة تبتدى تغلى تانى نبتدى نحسب الوقت اللازو لكل نوع من الخضار
6- يعنى مثلا ...... البسلة والكوسه دقيقه واحدة بعد الغليان
اما باقى الخضر ........ دقيقتين بعد الغليان
7- ارفعى المصفاه من الماء بالخضار اللى فيها وحطيها على طول تحت الحنفيه وبعدين صفيها من الماء

طيب نجمدهم ازاى ؟؟؟؟

1- ضعى الخضار بعد مايبرد مباشرة فى الاكياس البلاستيك يملأ الكيس الى 3/4 ةبالخضار ويوضع على المنضده ويضغط على الكيس فى اتجاه الفتحه لاخراج الهواء بقدر الامكان ثم يقفل جيدا ( بتسخين نصل سكين ويمرر على الحواف مع الضغط

2- نرتب الاكياس فى الفريزر ومده الحفظ من 9 شهور لسنة

تجميد الخرشوف

نشيل اوراقه الخارجية وننضفه من جوه ونشيل قلبها اللى على هيئة شعيرات صغيرة رفيعه لحد ما الخرشوفه تبقى عامله زى الطبق وبعدين تضعيه فى ماء بارد وعصير ليمون قبل ما تسلقيه
وعند السلق نضعه فى ماء مغلى مضاف له عصير ليمونة ( علشان يفضل لونه ابيض)
وبعدين نكمل زى باقى الخضر

تجميد القرنبيط
بالسكينة نفصل الوردات وبعدين تغسليها بالراحه علشان متفرطش معاكى قبل ما تسلقيه
وعند السلق نضعه فى ماء مغلى مضاف له عصير ليمونة ( علشان يفضل لونه ابيض)
وبعدين نكمل زى باقى الخضر

تجميد القلقاس

نقشر القلقاس ونغسله وننشفه ونقطعه مكعبات ونسلقه
عند السلق نضعه فى ماء مغلى مضاف له عصير ليمونة ( علشان يفضل لونه ابيض)
وبعدين نكمل زى باقى الخضر

تجميد الملوخيه الخضراء النيه
1- نقطف الورق ونغسله كويس بالماء كذا مره
2- نتركها تنشف وبعدين نخرطها
3- نغلى الماء ( كوب ماء لكل كيلو ملوخيه مخرطه )
4- نضع الملوخيه فى الماء ونقلبها كويس (علشان التقليب ده هو اللى حيخلى لونها اخضر زى ما هو لانه معروف ان تقليب الملوخيه فى الماء المغلى بيتلف الانزيمات اللى موجودة فى الورقه وتكتسب اللون الاخضر المزهزه ) لمده دقيقه واحده
5- اطفى النار واتركيها فى الماء المغلى زى ماهى لحد ماتبرد خاااالص هى والماء بتاعها حتلاحظى انها تخنت عندك وبقيت غليظة شويه
6- نضعها فى اكياس ونخرج الهواء بنفس الطريقه اللى قلناها (اظن عارفينها كلكم ما شاءالله شيفات كبار ) ونقفل الاكياس كويس
7- نضعها فى الفريزر للتجميد ومده الحفظ لحد 5 او 6 شهور

تجميد الملوخيه المطهيه
بعد ما تعملى الملوخيه عادى وتستوى او بعد ما تاكلوا بالهنا والشفا تتركى الملوخيه تبرد تماما
ضعيها فى الكيس او العلبه اللى حتحفظيها فيها وتغطيها كويس وتضعيها فى الفريزر لمده لا تذيد عن 10 ايام
ولما تيجى تطلعيها من الفريزر علشان تاكلوها
ضعيها فى حله وهى مجمده زى ما هى بس على نار هاديه لحد ماتفك كلها من التلج وانتى بتقلبى ومتغطيش الحله خالص خليها مكشوفه بدون غطاء ومتخليهاش تغلى خالص وهى مجمدة

تجميد الباميه
1- اغسليها كويس وصفيها من الماء
2- قمعيها يعنى شيلى الكاس اللى فوق وبعدين ضعيها فى المصفاه وغطسيها فى الماء المغلى بحيث تكون كلها داخل الماء لمده دقيقتين
3- شيلى المصفاه من الماء وضعيها تحت الحنفيه فى لحظتها لحد ما تبرد وصفيها كويس
4- ضعيها فى الاكياس مع اخراج الهواء وتكملى بنفس الطريقه بتاعه الخضر

طيب ليه بيفضل ان نسلق الخضار قبل تفريزه ؟؟؟؟

طبعا احنا ممكن نجهز الخضار ونقسمه فى الاكياس وعلى الفريزر على طول لكن علميا ان الخضار بيفضل سلقه قبل تفريزه ليه ؟؟؟؟(ما احنا قلنا نفهم مش نحفظ ....صح يا حبيبة ابراهيم ؟؟)
1- لازم نضع الخضار فى ماء مغلى قبل التفريز حتى ولو كانت مده السلق دى صغيرة لا تزيد عن دقيقة واحدة او دقيقتين .....لية؟؟؟؟؟؟؟

بالراحه كده وواحدة واحدة.... الخضار بيكون فيه انزيمات فى نسيح النبته نفسها الانزيمات دى وظيفتها انها بتغير شكل وطعم الخضار لما يتجمد بيتغير شكله
( يعنى تحسى ان الخضار زى مايكون شايخ او لونه مفتح او تلاقى جزء منها مبيشربش من الصلصه المستوى فيها )

فلما نيجى نغليه المياه المغليه دى بتخلى الانزيمات دى تتلف يعنى بتقلل من وظيفتها يعنى تخلى الخضار يفضل طعمه ولونه حلو

2- لان سلق الخضار قبل التفريز بيقلل وقت الطهى

واحدة حتسئلنى وتقولى امال الانزيمات دى لزمتها ايه ؟؟؟؟ الانزيمات دى بتفيد النبات قوى وهو على الشجرة وهو فى المزرعه لكن مبتفيدوش وهو متجمد

بسله - بازلاء
دورة التفريز من الالف للياء %D8%B5%D9%88%D8%B1%20%D8%AE%D8%B6%D8%A7%D8%B1%20%D9%88%20%D9%81%D9%88%D8%A7%D9%83%D9%8722_bmp

دورة التفريز من الالف للياء %D8%B5%D9%88%D8%B1%20%D8%AE%D8%B6%D8%A7%D8%B1%20%D9%88%20%D9%81%D9%88%D8%A7%D9%83%D9%8722_bmp

قلقاس

فاصوليا خضراء

كوسة

دورة التفريز من الالف للياء Cousa

بامية

سبانخ

دورة التفريز من الالف للياء 275189_spinach_2

ملوخيه

دورة التفريز من الالف للياء Molwkhih

قرنبيط - زهره
دورة التفريز من الالف للياء 3405alsh3er

(تابع ) تفريز الخضار

طيب بعد ما نطلع الخضار من الفريزر وتيجى نستعمله نتعامل معاه ازاى ؟؟؟؟؟

1- لو حنسويه على النار عادى
2- لو حنسويه فى الفرن
3- لو حنحمره

1) لو حنسويه على النار عادى

· تطهى الخضروات وهى مجمده بحالتها
· اعملى التقليه الاولى (الكشنة) عادى زيت او سمن والبصله لحد ماتصفر وضعى الصلصه او الطماطم المعصورة (يعنى طريقتك المعتادة اللى بتسوى بيها الخضار واول ما السائل سواء شوربة او ماء او صلصه تغلى ضعى الخضار على نار هادية ولما تقلبيه يفضل التقليب بشوكة لحد مايستوى

· خلى بالك ان كمية الماء او الصلصه او الشوربة (المرقه) اللى بتسوى فيها الخضار تكون اقل من السائل اللى بتسوى فيه الخضار الطازج .....طب ليه ؟؟؟؟؟؟(لازم نفهم ) علشان الخضار المثلج بيكون محتفظ لسه بشوية ماء من التلج اللى متجمد فيه ولما الخضار بيسيح بينزل المياه دى فى الحله

· مدة الطهى بتكون اقل من الخضار الطازج

· اذا حبيتى تسويه فى البرستو (حله الضغط ) خلى بالك انه مش حياخد اكتر من دقيقتين فقط بعد غليان الصلصه

2) لو حنسويه فى الفرن

دورة التفريز من الالف للياء 38074.imgcache

دورة التفريز من الالف للياء 38074.imgcache

· طبعا انتى بتكونى حطاه فى الصينية او الطاجن زى ما اتفقنا ..طلعيه من الفريزر واتركيه يهدا وينزل كمية التبريد الشديدة الظاهرة قدامك
· دخليه الفرن متوسط الحرارة لحد ماتلاقى الخضار فك ابتدى كل شوية تهزى الطاجن او الصينية مش بالمعلقه

3) لو حنحمره

دورة التفريز من الالف للياء 1936880_b311172ac2_m

دورة التفريز من الالف للياء 1936880_b311172ac2_m

· بالنسبة للبطاطس اللى انتى مجهزاها للتحمير اللى بتكون مقطعه صوابع ومسلوقه

· وبرضه لو عاملة مثلا قرنبيط سلقاه وعملاه بيض وبقسماط وحتحمريه

· فبيكون التحمير بسيط مش غزير يعنى بتضعى فى مقلاية واسعه او كبيرة المادة الدهنية بتاعتك سواء زيت او زيت وسمن او سمن لحد ماتسخن ويكون الخضار فك من التلج نص فكه تضعى الخضار على نار هادية وبرضه تهزى المقلايه متقلبيش بالمعلقه لحد ما كله يفك

· ارفعى درجة الحرارة علشان الخضار يستوى وياخد اللون الدهبى

بالنسبة لتفريز الخضره اللى هى الشبت والبقدونس والكسبرة انا بصراحه مبحطهمش فى الفريزر خالص ولا عادى ولا فى خلطة المحشى يعنى لو انا عايزة احتفظ بيهم فى التلاجة عادى لاطول وقت يا اما
1- بغسله وامسكه فى ايدى انطره جامد جامد من المياه وبعدين احطه يا اما فى فوطة صغيرة او جرنال والفه واضعه تحت الفريزر
2- او اخرطه بالسكينة من غير ما اغسله واضعه فى كيس نايلون واقفله واضعه فى التلاجة
3- او احتفظ بيه فى علب التابروير فى التلاجه

وبالنسبة للمحشى بصراحه والدتى بتحشى الورق عنب والكرنب وتضعه فى علبه بلاستيك او ترصصه فى اطباق فويل وبعدين كيس نايلون وتحتفظ بيه فى الفريزر لكن انا بصراحه مبحبوش متفرز سبحان الله مبستطعموش زى الطازج لكن لو حفرزه
1- لو حعمل الخلطة واضعها فى الفريزر ولما اطلعها علشان احشى المحشى بضع عليها زياده خضرة طازة واخلطهم ......يعنى لما بفرز اى حاجة داخلها خضره لازم لما اجى استخدمها اخرط عليها بالسكينة تانى خضره طازجة

وبالنسبة لسؤال الملوخيه ممكن تفرزيها بدون ماء ولا شوربه فى كيس يعنى الطريقتين كويسين بس اللى بكون مدوباها بتريحنى اكتر وانا بفكها

وبالنسبة لسؤال النعناع انا بصراحه مش بضعه فى الفريزر
1- يا اما بنشفه واضعه فى علبه او برطمان علشان استخدمه مثلا فى الشاى
2- يا اما بقطف الورق لوحدة واحتفظ به فى علب التابروير
لو نسيت سؤال معلش فكرونى بيه

تفريز المعجنات
دورة التفريز من الالف للياء Photo-0757

ازاى نجمد الاصناف المستخدم فيها الخميرة بيرة ؟

1- اذا كنتى حتستخدمى العجينة فى الحال يبقى تضعى مقدار الخميرة فيها حسب مقدار الوصفه لكن لو حتجمدى العجينة فى الفريزر لحين استحدامها يبقى لازم تزودى مقدار الخميرة قليلا (لتتلافى الفقد فى خلايا الخميرة )

2- لازم تكون العجينة باردة اثناء العجن على قد ماتقدرى (ميكنش المطبخ حر قوى )

3- نحفظ العجينة فى الثلاجه فى اناء كبير او كيس بلاستيك حوالى من ساعتين ل 3 ساعات علشان تخمر ببطىء

4- طلعى العجينة ولتيها تانى بس بسرعه علشان متسخنش منك

5- اذا كنتى حتجمدى كميه عجينة كبيرة يبقى لازم تقسميها فى اكياس متحطيهاش كلها فى كيس واحد وخلى بالك لما تيجى تقفلى عليها الكيس متقفليهوش عليها بالظبط لأ خلى الكيس مريح شوية

6- اقفلى الكيس كويس جدا وتجمديها على طول (مدة الحفظ 10 ايام )
طيب لما تيجى تستخدمى العجينة وتطلعيها من الفريزر تفكيها ازاى ؟؟؟

يا اما تطلعيها من الفريزر وتحطيها فى فى التلاجة طول الليل
او
تطلعيها من الفريزر وتحطيها بره التلاجة حوالى من 2 – 3 ساعه لحد ماتلين
وبعد ماتطرى لتيها تانى كويس وشكليها زى ما انتى عاوزة وبعدين اتركيها فى مكان دافىء لحد ما تخمر ويتضاعف حجمها وبعدين اخبزيها عادى كأنك لسه عملاها

ازاى نحفظ الاصناف المستخدم فيها الخميرة بيرة ؟

زى الخبزبأنواعه والكعك المخبوز

انتى تخبزيه وتتركيه لحد ما يبرد وبعدين تلفيه فى الفويل وتحفظية

طيب نسأل سؤال مهم ازاى تجمدى وتحتفظى بالخميرة بيرة ؟؟؟

انا لما كنت فى السعودية دايما وانا مسافرة من مصر كنت باخد معايا خميرة بيرة من الفرن

1- قطعى الخميرة اول ماتشتريها قطع فى حجم الليمونة (كل قطعه لتخمير حوالى 2 كوب دقيق )

2- لفى كل قطعه فى ورقه ذبده او فويل ورصصيهم فى علبة بلاستيك او كيس بلاستيك بس اقفليه كويس وضعيها فى الفريزر

3- بتفضل عندك فى الفريزر لمدة من 3 – 6 شهور

طيب لما تيجى تستخدمى الخميرة وتطلعيها من الفريزر تفكيها ازاى ؟؟؟

شيلى الورقه اللى ملفوفه فيها
وبعدين حطيها فى كوب او طبق صغير واتركيها (تقريبا حتستغرق 1/2 ساعه )
اما لو كنتى مستعجله عليها
ابشريها الاول علشان تتفرفط ودوبيها فى ماء دافىء

البيتزا

يا اما تحفظيها وهى عجينة نيه

او تحفظيها وهى كامله
ازاااى ؟
لو حتحفظيها وهى عجينة يبقى بعد ماتخلصى العجينة
ضعيها فى كيس بلاستبك كبير ودخليها الفريزر تجمد ولما تيجى تستخدميها

طلعيها وخليها لما تفك خالص من الثلج وتبقى طريه
وبعدين تلتيها تانى كويس واعمليها واحشيها وبعدين اتركيها تخمر وبعدين اخبزيها

ولو حتجمديها وهى كامله التجهيز

تعجنيها عادى وتلتبها وبعدين تشكليها وتحطيها فى الصاج المبطن بورق زبد مدهون او فويل
ثم ضعى الحشو على سطحها
ثم ضعى الصاج داخل كيس برستيك وضعيها فى الفريزر
وعند استعمالها
طلعيها لحد ما التلج يفك خالص وبعدين اتركيها تخمر وبعدين اخبزيها

لكن لو سألتى انهى طريقه احسن لتفريز البيتزا اقولك
احفظيها وهى عجينة لسه بدون حشو لانها بتعطى نتيجه احسن

تفريز المعجنات والحلويات

دورة التفريز من الالف للياء Photo-0838_1

اولا عجينة الشو

نشكل العجينة سواء بلح الشام او اكلير او بروفيترول

اذا كنتى عايزة تجمديهم نيين من غير ماتحمريهم او تدخليهم الفرن يعنى نيه

1- بعد ماتشكليهم رصصيه فى صاج او صينية ودخلى الصاج الفريزر لحد ما يجمد
2- شيليهم من الصاج وهما متجمدين ورصصيهم فى علبه بلاستيك
3- غطى العلبة بورقه ذبد ثم بالغطاء بتاع العلبه واحفظيه فى الفريزر

طيب لما تيجى تستعمليه :-
الاكلير والبروفيترول رصصيهم فى الصينية المدهونة لحد ما يفك شوية من الثلج وبعدين دخليه الفرن متوسط الحرارة

لكن البلح الشام اتركيه يفك شويه من الثلج وبعدين حمريه عادى فى الزيت الغزير

اذا كنتى عايزة تجمديهم وهما مخبوزين

الاكلير والبروفيترول اخبزيهم بس ماتحشيهمش واتركيه يبرد

والبلح الشام حمريه بس متحطيلوش الشراب واتركيه يبرد
رصصيهم فى علبه بلاستيك وغطيهم وجمديهم فى الفريزر

طيب لما تيجى تستعمليه :-

1- طلعيهم من الفريزر وخليه يفك شويه من الثلج
2- وبعدين حطيهم فى صاج او صينية ودخليهم فرن حار نوعا لاعاده تسخينه
3- بعد مايبرد يحشى بالكريمة او حسب الرغبة

تجميد الفطائر

عجينة الميل فى النيه

1- نشكل العجينة حسب الرغبه
2- ثم نضعها فى الصوانى المستديرة او المستطيله وندخلها الفريزر لحد ماتجمد
3- وبعدين نشيلها من الصينية وهى متجمدة ونلفها فى ورق ذبدة
4- ثم نضعها فى كيس بلاستيك او علبه وتحفظ فى الفريزر

طيب لما تيجى تستعمليها :-

رصصيهم فى الصينية المدهونة لحد ما يفك شوية من الثلج وبعدين دخليه فرن متوسط الحرارة

اما اذا كنتى عايزة تحفظيها وهى مخبوزة :-

بعد ماتتخبز وتتركيها تبرد رصصيهم فى علبه بلاستيك وغطيهم وجمديهم فى الفريزر

طيب لما تيجى تستعمليها :-
1- طلعيهم من الفريزر وخليه يفك شويه من الثلج
2- وبعدين حطيهم فى صاج او صينية ودخليهم فرن حار نوعا لاعاده تسخينه
3- بعد مايبرد يحشى بالكريمة او حسب الرغبة

تجميد الكعك(الكيك)

اولا الكعك الاسفنجى

يفضل تجميده مخبوزا لانه يفقد الهواء الذى ادخل فيه بخفق البيض ولا يعطى ناتجا جيدا وهو مجمد نىء

ثانيا الكعك الدسم
يمكن تجميده نىء ويبقى فى حالة جيدة

تجميد الكعك الدسم نيئا

1- بعد ماتعملى الكيكة ضعيها فى الصينية او القالب اللى انتى حتخبزيها فيه وتكون مدهونة ومرشوشة بالدقيق

2- دخليها زى ما هى الفريزر لحد ما يجمد سطحها

3- وبعدين ضعى الصينية فى كيس بلاستيك وااحفظيها فى الفريزر

طيب عند الاستعمال :-
1- طلعى الصينية او القالب من الفريزر واتركيها حوالى ساعه وكده حيكون التلج ساح نوعا ما
2- دخليها الفرن تستوى زى الكيك الطازج فى فرن متوسط الحرارة حتى ينضج

ملحوظة
الكيك المجمد بيكون اصغر حجما من الكيك المخبوز الطازج / وبيكون اقل نكهه من المخبوز الطازج

تجميد الكيك المخبوز
1- بعد ماتخبزى الكيك شيليه من القالب او الصينية واتركيه يبرد تماما
2- لفيه فى الفويل او ورق ذبده ثم فى كيس نايلون
3- ودخليه الفريزر يجمد

ملحوظة
يجب عدم تركه بضعه ايام قبل تجميده حتى لايفقد طزاجته وطعمه الجيد ونكهته
(يعنى ) متسبيهوش كذا يوم بره او بعد ما الاولاد رفضوا ياكلوه وتفكرى تجمديه بعد كده

طيب عند الاستعمال :-
1- ضعيه فى فرن حار نوعا لمدة 10 دقائق
2- ويترك مغلفا بورق الذبد او الفويل ليعطى ناتجا كالطازج

تجميد الكب كيك :-

يجمد الكب كيك نى يعنى بعد ماتعمليه وتحطيه فى القوالب بتاعته المدهونة او الورق المخصوص المدهون وتدخليهم الفريزر

ولما تيجى تستخدميه طلعيه ودخليه الفرن على طول للتسوية

التورتة الجاهزة

( لما بيجيلك ضيوف بيجبولك معاهم مثلا تورتة وهما جايين وانتى بتبقى عامله حاجة حلوة فيتحتارى تعملى ايه بالتورتاية (طبعا دى عمرها ما بتحصل )

اذا كانت التورتاية عليها كريمة مخفوقه او كريم شانتى او فندان يفضل عدم تجميدها علشان لما بيجى الثلج يسيح منها مبيكنش طعمها حلو لتفكك مكوناتها

لكن
ا ذا كانت التورتاية عليها حلوى ااذبد او حلوى الشيكولاتة الجامدة فممكن تجميدها بأننا نضعها فى علبه كبيرة بغطاء ونضعها فى الفريزر

واما نيجى ناكلها وعايزين نطلعها طلعيها من الفريزر وخليها زى ما هى فى العلبة علشان تفك على مهلها

مده تخزين التورتة الجاهزة اسبوع واحد بالكتير

يعطيك العافية و القوة

على نقل هذه الدورة المفيدة جدا ً

و المرتبطة بحياتنا المطبخية

مشكوووورة يالغالية

الله يعطيك العافية خيتوو سمااا
والف شكر على التثبيت

يسلموو على الطرق الحلوة

» الاسعافات الاولية من الالف الى الياء
» طريقه تغليف الهدايا من (الالف إلى الياء) جديد
» من الالف الي الياء فيما يخص الشعر واسراره العنايه به
» دورة قص الشعر
» انطلاق دورة مراقبي التعداد بالشمالية