السلام عليكم حبيباتي
جايبه لكم طبخه من اختراعي ممكن تستغربوها بس ترى طعمه حلو حييييييييل!
بلا قرقر المقادير
4حبات جزر كبير لازم كبير ما لقيتي كبير خليهم10 حبات من المتوسط
4 حبات جزر يماني او المعروف بالبطاطا الحلوه كمان يكونو كبار
1حبه ملفوف
4 حبات بصل متوسطة الحجم او 3 كبار
1 حبة ثوم مو فص لا البصله كامله فيها اكثر من فص
3 حبات باذنجان
1 حبه دبه(قرع)
حزمة ورق بصل
فلفل اسود وملح
تمر هندي(حمر)
حزمة بقدونس
علبه كبيره معجون طماطم مخلوطه بكاسة مويه او 10 حبات طماطم مفرومه و3 ملاعق كبار معجون طماطم
زيت دوار الشمس
حزمة كزبره
1 كيلو رز بسمتي
سمكه كبيره هامور او اي نوع تحبيه بس يكون كبير ومقطع انصاف وما يكون مشيول
الحسك تبعه عشان فوايده!
نجي للطريقه:تقطعي البصل وورق البصل والثوم تقطيع عادي مو شرط تفرميه
والبقدونس والكزبره تفرميهم فرم ناعم
تقشري الخضروات الباقيه بس واقطعي كل ثمره بالنصف على طولها يعني كل ثمره تكون مقسومه نصفين بشكل طولي والملفوف تقسميه ارباع
تكوني منظفه السمك تحطي الطنجره على النار وتحطي فيها 7 ملاعق كبار من الزيت
تحطي السمك تحمريه شوي دقيقتين فقط وتطلعيه تحطي مكانه البصل وورق البصل والثوم والبقدونس والكزبره وتحمريهم بعدين ترجعي السمك وتحطي فلفل اسود وملح حسب الرغبه
وتحطي عليهم معجون الطماطم او الطماطم الطازجه
وتخليهم على نار متوسطه لحد ما تحسي ان المعجون صار قوامه متماسك
تحطي الخضار ما عدا الملفوف وتغمريهم بالمويه وتخليها تغلي ولما تغلي تحطي الملفوف بس ملاحظه مهمه والمويه تغلي مو حيكون فيه فقاعات في المويه وحيطلع الزيت فيها وخريه بالملعقه وسقطي الملفوف مو تغرفي الزيت برا لا وهو في الطنجره وخريه بالملعقه عشان لا يقسا الملفوف ويطلع كله زيت لانه معروف يشرب الزيت كثير
وبعدين خلي الخضار تغلي من غير غطا 5 دقايق وبعدين غطيه وخليه على نار متوسطه لمدة 40 دقيقه وفي ذا الوقت تكوني غاسله الرز ومنقعتيه وبعدين جيبي ملعقه او ملاس وطلعي الخضار والسمك بشويش عشان لا يفرط ويتفتفت
وطلعيه في صحن غويط من غير المرق وغطيه بقصدير عشان لا يبرد وخذي كاسه من هذا المرق ونقعي فيها التمر الهندي
وفي المرق اللي في القدر حطي حبتين فلفل حار بطولهم من غير ما تقطعيهم
واظبطي الملح بعدين صفي الرز وحطيه وخليه يغلي لحد ما تنشف مويته غطيه بقصدير وبعدين بغطا الطنجره وارخي النار تحته وخليه نص ساعه وبعدين قدميه حطي الرز في صحن تقديم كبير وحطي فوقه الخضار والسمك
وتخلطي التمر الهندي بالملعقه بقوه وبعدين تصفي شوي منه على وجه الكبسه
والباقي تحطيه في صحن جانبي للي يبي زياده وزينيه باليمون
وبالف صحه وعافيه
ملاحظه:الكميه تكفي 12 شخص يعني للي عندها اسره كبيره
واللي بتسويها لافراد قليلين تنقص الكميه.
لا تنسوني من دعائكم بان يغفر لي ربي وانحف من غير مرض وكل من تبغى تنحف وشكرا.
__________________
الموقع
العمل
